વરસાદ ની મૌસમ પુરજોશમાં ખીલી છે. બધે જ વરસાદી વાતાવરણ છે એમાંય કવિઓની આ પ્રિયમૌસમ છે,તો આજે માણીએ પ્રો.મહેશભાઈ મકવાણા ની એક વરસાદી ગઝલ અને ભીંજાઈએ આ ઝરમર વરસાદમાં કોઈની યાદો ની સાથે…
આજ અનરાધાર વરસે તું ને આ વરસાદ;
ચિત્ત ડામાડોળ કરશે તું ને આ વરસાદ.
આ પવન પાગલ,અદા બાંકી,થીરકતી ચાલ,
લોહીમાં બેફામ ફરશે તું ને આ વરસાદ
છે છલકતું રૂપ રેલમછેલ છે આકાશ,
આગ અંગે અંગ ભરશે તું ને આ વરસાદ.
ઝુલ્ફની કાલી ઘટા,નટખટ નજરનો તોર,
પ્રાણ ગાડોતૂર કરશે તું ને આ વરસાદ.
હુંય રેલાતો જઉં પલળીને પાણી જેમ,
આજ મારામાં ઘૂઘવશે તું ને આ વરસાદ.
કેમ ઝાલ્યો જાય રસબોળ રસિયો જીવ,
મન મૂકીને આજ વરસે તું ને આ વરસાદ
-પ્રો.મહેશભાઈ મકવાણા
શબ્દ સાધના પરિવાર 
વરસાદની મોસમમાં મહેશભાઇની વરસાદી ગઝલ… ક્યા બાત હૈ. મઝા આવી ગઈ. મહેશભાઈની આ ગઝલ રવિસભામાં સાંભળ્યાનું યાદ છે.
આજ મારામા ઘૂઘવશે તુ ને આ વરસાદ….કેમ ઝાલ્યો જાય રસબોળ રસિયો જીવ…આવા મઝાના શબ્દો અને એ ઘેઘૂર મીઠો અવાજ ..આંખ બંધ હોય તો પન કહી શકુ કે મહેશભાઇ નો જ હોય..મૌસમ પ્રમાણે ની રચના મુકવા બદલ ઇશ્ક ને અભિનંદન
મકવાણા સાહેબ ની સરસ રચના !
ઝુલ્ફની કાલી ઘટા,નટખટ નજરનો તોર,
પ્રાણ ગાડોતૂર કરશે તું ને આ વરસાદ.
નજરનો તોર શબ્દનું પ્રયોજન ગમ્યું
ખરેખર આખી ગઝલે તરબતર કરી નાંખ્યો
–